" भाग पाडशी ...

भाग पाडशी मनातले तू बोलायाला ;
गुपीत सगळे मनातलेही सांगायला ... 

ओलेत्या केसांचा सांगू गंध असा की ,
समाधीतला सुगंध आला भेटायला ... 

विश्वामित्रा विरघळला रे बर्फ तपाचा ;
पहा शमाची शाल लागली उसवायाला ... 

गळून पडली कशी जपाची माळ बरे ही !
तुझ्या रुपाचा धूप लागला पसरायाला ...

तिखटावरती तेलच नाही मिळे त्यास. मग -
साजुक तुपही अवघड जाते पचवायाला ...

प्रेमालाही इथे नितीचे नियम लागले ;
घुसमट होते मनातले मग मांडायाला...

किती निरागस थेट बोलते प्रेमाचे , पण -
कोरा कागद शीक अता तू वाचायाला ..

त्याग हीच प्रेमाची आहे ओळख राणी ;
जमायला तुज हवे मलाही सोडायाला...

दोनपणा अन दुरावाच तर पिकतो येथे ;
भाग्य लागते अद्वैताला वाचायाला ...