'तुझ्यामधे मी ...

तुझ्यामधे मी किती हरवलो !
नाव विसरलो , गाव विसरलो.... 

कळले सुद्धा नाही ; केव्हा -
तुझाच प्रियकर होवुन बसलो .. 

हवे वाटले असेल तुजला ;
हृदय म्हणुन तर देवुन चुकलो .. 

नाजुक साजुक मुळे बिलगता ;
कातळ असुनी मी पाझरलो ...

फकीरसुद्धा तुला भावला ;
तुझ्यामुळे तर अमीर बनलो...

ईश्वर मजला तुझ्यात दिसला ;
तुला पाहुनी किती हरखलो ..

निराधार या नभास सोडुन ;
मी मातीच्या कुशीत शिरलो ..

कबूल करतो खुलेआम की ;
तुझ्यामुळे मी मज आवडलो...